Zyra Kombëtare e Auditimit (ZKA) ka njoftuar fillimin e auditimit të performancës me temën “Siguria e nxënësve në shkollat publike në Kosovë”, në kuadër të Planit Vjetor të Auditimit 2025/2026. Ky auditim do të përqendrohet në klasat VI-XII për periudhën 2022-2025.
Auditimi synon vlerësimin e sigurisë dhe përshtatshmërisë së ambientit shkollor, si dhe të mekanizmave që institucionet përgjegjëse kanë vendosur për parandalimin, trajtimin, raportimin dhe monitorimin e incidenteve të dhunës në shkolla. ZKA ka deklaruar se “qëllimi ynë është të sigurojmë që nxënësit të kenë një ambient të sigurt dhe të përshtatshëm për zhvillimin e tyre akademik dhe personal”.
Fushëveprimi i auditimit përfshin:
• Ministrinë e Arsimit, Shkencës, Teknologjisë dhe Informacionit;
• Inspektoratin e Arsimit;
• Drejtoritë e Arsimit në komunat e Prishtinës, Ferizajt dhe Gjakovës.
Gjithashtu, në auditim mund të përfshihen Policia e Kosovës dhe drejtoritë e saj rajonale, si dhe Qendrat për Punë Sociale të tri komunave të përfshira.
ZKA thekson se ky proces do të ndihmojë në identifikimin e sfidave dhe dobësive në menaxhimin e sigurisë në shkolla, si dhe do të ofrojë rekomandime për përmirësimin e mekanizmave ekzistues, në funksion të mbrojtjes së nxënësve dhe zhvillimit të një ambienti arsimor më të sigurt.