Një incident zjarri ka ndodhur gjatë mesditës së sotme në aksin rrugor Korçë–Ersekë, në afërsi të zonës së njohur si Qafa e Qarrit. Një automjet tip Benz, i cili ishte në lëvizje, është përfshirë nga flakët, duke u dëmtuar thuajse plotësisht.
Sipas informacioneve paraprake, brenda automjetit udhëtonte një familje. Të gjithë personat që ndodheshin në mjet kanë arritur të dalin në kohë dhe nuk kanë pësuar lëndime. Në vendngjarje kanë mbërritur menjëherë forcat zjarrfikëse të Bashkisë Kolonjë, të cilat kanë neutralizuar flakët dhe kanë shmangur përhapjen e mëtejshme të tyre.
Autoritetet policore kanë nisur veprimet procedurale për zbardhjen e rrethanave të ngjarjes. Si shkak paraprak dyshohet një defekt teknik, ndërsa vlerësimet përfundimtare pritet të përcaktohen pas ekspertizës përkatëse.