Mesditën e sotme, rreth orës 13:00, një automjet tip fuoristradë është përfshirë nga flakët në zonën e Llogarasë, pak metra para hyrjes së tunelit. Si pasojë e zjarrit, mjeti është shkrumbuar kryesisht në pjesën e përparme, ku ndodhet motori.
Sipas informacioneve paraprake, dyshohet se shkaku i ngjarjes ka qenë një defekt teknik në automjet, ndërsa përhapja e flakëve është favorizuar nga temperaturat e larta që kanë përfshirë ditët e fundit qarkun e Vlorës.
Menjëherë pas njoftimit, në vendngjarje kanë mbërritur shërbimet e zjarrfikësve të Vlorës, të cilët kanë neutralizuar flakët dhe kanë shmangur rrezikun e përhapjes së zjarrit në zonën përreth. Fatmirësisht, nga kjo ngjarje nuk raportohet për persona të lënduar.