Një ngjarje tronditëse është regjistruar në qytetin Kościerzyna të Polonisë, ku kamerat e një ekipi televiziv kanë filmuar përplasjen e një 14-vjeçareje nga një automjet. Gazetari i TVP Info, Miłosz Sieliwończyk, ndodhej në terren për të raportuar për vdekjen tragjike të një fëmije 3-vjeçar, kur dëgjoi zhurmën e përplasjes pas shpinës. Pas hetimeve të kryera, Policia konfirmoi se 14-vjeçarja pësoi vetëm gërvishtje të lehta dhe nuk pati nevojë për shtrim në spital.
Pamjet e transmetuara treguan momentin kur automjeti, që po kthehej në një rrugë dytësore, goditi adoleshenten që lëvizte me skuter elektrik, duke e rrëzuar atë në asfalt. Ekipi televiziv ndërpreu menjëherë raportimin për t'i dhënë ndihmën e parë të resë dhe për të njoftuar shërbimet e emergjencës. Gazetari udhëzoi operatorin që të fokusonte targën e makinës për t'ia dorëzuar pamjet autoriteteve policore si provë materiale.
Sipas hetimeve paraprake, drejtuesi i automjetit nuk kishte konsumuar alkool, por u konstatua se nuk posedonte leje drejtimi. Megjithëse u largua fillimisht nga vendi i ngjarjes, ai u kthye pas disa minutash. Ndërkohë, autoritetet po vazhdojnë procedurat ligjore për të zbardhur rrethanat e plota të aksidentit.
Gazetari po raportonte në atë zonë për një tjetër tragjedi, ku një fëmijë 3-vjeçar humbi jetën pasi u përplas nga një makinë, pavarësisht përpjekjeve të gjata për reanimim nga ekipet e zjarrfikësve dhe ato mjekësore.
Përditësime
Policia konfirmoi se 14-vjeçarja e përfshirë në aksident nuk ka pësuar dëmtime serioze dhe nuk është shtruar në spital.