Agjencia e Ushqimit dhe Veterinarisë (AUV) ka ndërmarrë masa për tërheqjen e menjëhershme nga tregu të produktit ushqimor "Flips Ketchup", të prodhuar nga kompania Pestova L.L.C., për shkak të pranisë së padeklaruar të gjurmëve të alergjenit të qumështit. Masa është marrë në përputhje me njoftimin e Sistemit Evropian të Alarmimit të Shpejtë për Ushqim dhe Ushqim për Kafshë (RASFF), me numër reference 2026.8267.
Sipas njoftimit zyrtar, gjatë një kontrolli në Slloveni është marrë një mostër e produktit, analizat e së cilës konfirmuan praninë e gjurmëve të qumështit, çka e bën produktin të pasigurt për konsumatorët e ndjeshëm ndaj këtij alergjeni. Pas marrjes së këtij informacioni, inspektorët e AUV-së kryen kontroll te operatori ekonomik, ku identifikuan se loti FK 04/26, me datë skadimi 11.02.2027, përfshin 20,406 pako të shpërndara në treg.
Urdhri i AUV-së përfshin tërheqjen e produktit nga tregu, ndalimin e shitjes ose shpërndarjes së sasive që gjenden në depo, si dhe masën kufizuese për prodhimin dhe vendosjen në treg të produkteve të reja deri në përfundimin e analizave laboratorike shtesë.
Kompania Pestova ka reaguar duke sqaruar se bëhet fjalë për një seri të kufizuar të produktit dhe ka mohuar kategorikisht përdorimin e qumështit, laktozës ose nënprodukteve të tjera të qumështit në asnjë fazë të procesit të saj prodhues. Sipas kompanisë, pas sqarimit të situatës dhe me rekomandim të autoriteteve sllovene, produktet e saj janë lëshuar për qarkullim të lirë në tregun slloven dhe të vendeve të tjera të Bashkimit Evropian, ndërsa po kryhen analiza shtesë për të vërtetuar origjinën e gjurmëve të raportuara.