Ministria e Bujqësisë, Pylltarisë dhe Zhvillimit Rural dhe Agjencia e Ushqimit dhe Veterinarisë (AUV) njoftojnë se përmes Sistemit Evropian të Alarmimit të Shpejtë për Ushqim dhe Ushqim për Kafshë (RASFF), është pranuar njoftimi me nr. 2026.1018 i kategorisë “Alert notification”. Ky njoftim lidhet me praninë e toksinës cereulide në formulën për foshnje të markës APTAMIL, të prodhuara nga kompania Nutricia Cuijk B.V. në Holandë.
Bazuar në analizat laboratorike të autoriteteve të Bashkimit Evropian, disa lote tejkalojnë kufijtë e lejuar. Në Kosovë janë identifikuar sasi të kufizuara, të importuara më 19.01.2026 nga një operator ekonomik i autorizuar, të evidentuara në pikën kufitare.
Produktet e identifikuara
• APTAMIL 1 – 830 g:
• Lot 111488577, skadim 01.09.2026
• Lot 111516238, skadim 17.11.2026
• Sasia: rreth 5 paketime (3.94 kg bruto)
• APTAMIL 2 – 830 g:
• Lot 111463178, skadim 04.07.2026
• Lot 111475576, skadim 30.07.2026
• Sasia: rreth 9–10 paketime (7.89 kg bruto)
Menjëherë pas njoftimit RASFF, AUV kryen kontrolle zyrtare në terren më 09.03.2026. Produktet nuk ndodhen në shitje, por janë të bllokuara në depo dhe në procedurë të asgjësimit. Nuk është konstatuar qarkullim apo shitje tek konsumatorët, rreziku konsiderohet shumë i ulët dhe nuk ka ankesë nga konsumatorët. Autoritetet vazhdojnë monitorimin e tregut.