Agjencia e Ushqimit dhe Veterinarisë (AUV) e Kosovës ka njoftuar tërheqjen nga tregu të formulës ushqimore për foshnje Aptamil AR 2, me paketim ENG 24 x 400 gr.
Kjo masë u mor pasi, përmes Sistemit të Alarmimit të Shpejtë për Ushqim dhe Ushqim për Kafshë (RASFF), u pranua njoftimi me numër 2026.0598. Në një seri të këtij produkti, i cili përdoret për qëllime të veçanta mjekësore, u identifikua prania e substancës Cereulide.
Duke qenë se niveli i rrezikut vlerësohet serioz, AUV-ja, në bashkëpunim me kompaninë importuese UNION SH.P.K. në Vushtrri, ka ndërmarrë masa të menjëhershme për tërheqjen e produktit. Prodhuesi është Nutricia Infant Nutrition Ireland Ltd. (Danone).
AUV-ja u bën thirrje konsumatorëve që posedojnë këtë produkt të mos e përdorin dhe ta kthejnë në pikat e shitjes.
Agjencia mbetet e përkushtuar në monitorimin e vazhdueshëm të tregut dhe zbatimin e masave parandaluese dhe kontrolluese për garantimin e sigurisë ushqimore dhe mbrojtjen e shëndetit të konsumatorëve në Republikën e Kosovës.
Përditësime
AUV-ja ka tërhequr nga tregu dy produkte të reja Aptamil: APTAMIL 1 PRONUTRA 800 gr. ADVANC (lot 172911, skadim 10.11.2026) dhe APTAMIL PRE PROFUTURA DUO ADVA 800 gr (artikull 405663100).
Tërheqja erdhi pas njoftimit RASFF 2026.0663 nga Autoriteti Kombëtar i Ushqimit në Shqipëri.
Produktet, me origjinë nga Gjermania, u eksportuan nga Rossmann & LALA SH.P.K. në Shqipëri drejt Rossmann Kosova.
Inspektuesit kontrolluan depon e Rossmann Kosova, ku produktet u grumbulluan, bllokuan dhe planifikohet asgjësimi i tyre.
RASFF ka lëshuar dy njoftime të reja për praninë e toksinës Cereulide në produkte Aptamil:
• 2026.1018: Konfirmon toksinën në produkte Aptamil të prodhuara në Holandë.
• 2026.1017: Konfirmon toksinën në formulat për foshnje dhe për qëllime mjekësore të prodhuara në Irlandë.