Agjencia e Ushqimit dhe Veterinarisë (AUV) në Kosovë ka bllokuar 462 copë të një produkti ushqimor për fëmijë me origjinë nga Hollanda. Bllokimi erdhi pas konstatimit të pranisë së substancës Cereulide, e cila paraqet rrezik për shëndetin e konsumatorëve.
Njoftimi u mor nga Autoriteti Kombëtar i Ushqimit i Shqipërisë përmes Sistemit të Paralajmërimit të Shpejtë për Ushqimin dhe Ushqimin për Kafshë (RASFF), me referencë 2025.9963 (disa burime përmendin edhe 810066). Pas verifikimeve, u konstatua se subjekti “Rossmann & LALA SH.P.K.” në Shqipëri ka eksportuar këtë sasi për kompaninë “Rossmann Kosova”.
Në bashkëpunim me kompaninë, AUV realizoi bllokimin e menjëhershëm të produktit. Së shpejti do të nisë procesi i asgjësimit, në përputhje me legjislacionin në fuqi.
AUV thekson se, pavarësisht mungesës së inspektorëve, mbetet e përkushtuar në monitorimin e tregut dhe zinxhirit ushqimor për të garantuar ushqim të sigurt për konsumatorët në Kosovë. Agjencia u bën thirrje qytetarëve të jenë të kujdesshëm dhe të raportojnë dyshime për sigurinë e produkteve ushqimore.