Agjencia e Ushqimit dhe Veterinarisë (AUV) në Kosovë ka bllokuar produktin ushqimor për foshnja "Beba Suprem Pre" 800 g, me datë skadimi 05.2027 dhe kod identifikues EAN: 7613287226631.
Ky veprim erdhi pas një njoftimi zyrtar nga Autoriteti Kombëtar i Ushqimit i Shqipërisë. Subjekti Rossmann & LALA SHPK në Shqipëri e kishte eksportuar produktin në Kosovë, ku u importua nga kompania Rossmann Kosova.
Në bashkëpunim me kompaninë përkatëse, AUV realizoi bllokimin e menjëhershëm të produktit nga tregu. Në ditët në vijim do të nisë procesi i asgjësimit, në përputhje me legjislacionin në fuqi.
AUV thekson përkushtimin për monitorimin e vazhdueshëm të tregut dhe zinxhirit ushqimor, pavarësisht sfidave si mungesa e inspektorëve, për të garantuar ushqim të sigurt për konsumatorët.
Sipas një burimi, kompania prodhuese Nestlé në fillim të janarit kishte njoftuar tërheqjen e disa produkteve të saj, përfshirë formulat për foshnja, në dhjetëra vende evropiane për shkak të pranisë së mundshme të një bakteri që mund të shkaktonte të vjella.