Agjencia e Ushqimit dhe Veterinarisë (AUV) ka asgjësuar 7 998 copë produkte ushqimore për fëmijë të markave Aptamil dhe Nutricia Bebelac, me peshë totale prej 4 130,80 kg. Aksioni u realizua në bashkëpunim me kompaninë UNION shpk dhe u specifikua sipas datave të skadencës, në përputhje me njoftimet e pranuara nga Njësia e Alarmit të Shpejtë për Ushqim dhe Ushqim për Kafshë (RASFF).
AUV ka njoftuar se aktualisht po verifikon dhe gjurmon nëse ndonjë sasi e këtyre produkteve ka mbetur ende në treg. Agjencia thekson përkushtimin për monitorimin e vazhdueshëm të tregut dhe zbatimin e masave parandaluese e kontrolluese.
Qëllimi kryesor i këtyre veprimeve është garantimi i sigurisë ushqimore dhe mbrojtja e shëndetit të konsumatorëve në Republikën e Kosovës.