Agjencia e Ushqimit dhe Veterinarisë (AUV) ka njoftuar se ka marrë vendim për ndalimin e përkohshëm të importit të të gjitha llojeve të qumështit të përpunuar për foshnje Aptamil në Kosovë. Ky vendim hyn në fuqi më 11 shkurt 2026 dhe zbatohet në të gjithë territorin e vendit.
Vendimi bazohet në njoftimet e shpeshta të pranuara nga Sistemi i Alarmimit të Shpejtë për Ushqim dhe Ushqim për Kafshë (RASFF), sipas të cilave disa vende të Bashkimit Evropian, përfshirë Kosovën, po përballen me praninë e mundshme të toksinës Cereulide në këtë produkt.
AUV sqaron se qytetarët nuk kanë arsye për shqetësim, pasi për sasinë e futur më parë në treg janë marrë masa parandaluese. Në koordinim me operatorët ekonomikë, agjencia ka realizuar tërheqjen nga tregu të produktit të paralajmëruar. Inspektorët e AUV-së vazhdojnë gjurmueshmërinë për të verifikuar nëse ka mbetur ndonjë njësi e konsideruar e papërdorshme.
Të gjitha veprimet kanë prioritet mbrojtjen e shëndetit të foshnjave dhe konsumatorëve. Situata menaxhohet me përgjegjësi dhe në koordinim me partnerët ndërkombëtarë. AUV ka njoftuar operatorët ekonomikë për zbatimin e detyrueshëm të vendimit dhe premton informim të vazhdueshëm për zhvillimet e mëtejshme.
Përditësime
Agjencia e Ushqimit dhe Veterinarisë (AUV) ka urdhëruar tërheqjen e menjëhershme të produkteve Aptamil Pronutra 1, Pronutra 2 dhe Bebelac 1.
Këto produkte u prodhuan në Poloni nga Nutricia Zakłady Produkcyjne Sp. z o.o. dhe u importuan nga UNION SH.P.K., Vushtrri.
AUV e ka vlerësuar rrezikun si serioz.
AUV u bën thirrje konsumatorëve të mos i përdorin dhe t'i kthejnë në pikën e shitjes, veçanërisht ato me datat e skadimit specifike.