Ish-kryeministri dhe kandidati për deputet nga Lidhja Demokratike e Kosovës (LDK), Avdullah Hoti, ka kritikuar ashpër qëndrimin e qeverisë në detyrë lidhur me politikat energjetike dhe refuzimin e projektit të gazit amerikan. Sipas Hoti-t, ky projekt nuk është thjesht një nismë ekonomike, por është jetik për orientimin gjeopolitik të Kosovës, sigurinë energjetike dhe ruajtjen e aleancës me Shtetet e Bashkuara të Amerikës.
Përmes një reagimi, Hoti ka shtruar tri pyetje për kryeministrin në detyrë, Albin Kurti, duke kërkuar sqarime mbi arsyet e refuzimit të projektit të gazit, mungesën e investimeve në kapacitete të reja energjetike gjatë gjashtë viteve të qeverisjes, si dhe varësinë e vazhdueshme nga importi i energjisë. Ai nënvizoi se heshtja ndaj këtij procesi nuk është neutralitet, por bashkëfajësi.
Kritikat ndaj opozitës
Hoti ka shprehur pakënaqësi edhe ndaj subjekteve të tjera opozitare, duke i akuzuar se e shfrytëzojnë këtë temë vetëm gjatë fushatave zgjedhore. Sipas tij, fokusi i opozitës te përfitimi i posteve shtetërore, në vend të kauzave thelbësore, ka reflektuar negativisht në rezultatet e fundit zgjedhore.
Sipas Hoti-t, kauzat për të cilat qytetarët duhet të mobilizohen në protesta demokratike deri në largimin e qeverisë janë:
• Refuzimi i projektit të gazit amerikan.
• Suspendimi i Kosovës nga stërvitja ushtarake “Defender Europe ‘23”.
• Pezullimi i dialogut strategjik Kosovë-ShBA në shtator të vitit 2025.
Përditësime
Nënkryetari i PDK-së, Enver Hoxhaj, dhe deputeti Avdullah Hoti kanë kritikuar Qeverinë lidhur me projektin e gazit amerikan. Përmes një postimi në Facebook, Hoti ka bërë thirrje për protesta, duke e cilësuar braktisjen e projektit si humbje të një mundësie historike për sigurinë energjetike të vendit.