Kandidati për deputet nga radhët e LDK-së, Avdullah Hoti, ka vlerësuar se projektet energjetike Kosova e Re dhe Centrali i gazit mbeten iniciativat më strategjike për zhvillimin ekonomik dhe politik të vendit për dekadat në vijim. Sipas tij, anulimi i këtyre projekteve nga kryeministri Albin Kurti është shoqëruar me një fushatë mashtruese rreth ndotjes së ambientit, duke shpërfillur përdorimin e teknologjisë së avancuar perëndimore.
Hoti theksoi se këto projekte kanë gëzuar mbështetjen e Shteteve të Bashkuara të Amerikës. Ai kujtoi se kontrata për projektin e parë ishte nënshkruar në prezencë të ambasadorit amerikan në Prishtinë, ndërsa projekti i dytë ishte pjesë e Marrëveshjes së Uashingtonit, të firmosur në Shtëpinë e Bardhë në prani të ish-presidentit Donald Trump.
Sipas Hotit, anulimi i këtyre investimeve ka shërbyer për interesa që synojnë mbajtjen e Kosovës të varur nga importi i energjisë. Ai u bëri thirrje atyre që kanë mbështetur këtë vendim, qoftë në politikë apo në shoqërinë civile, të distancohen nga kjo politikë. Hoti shprehu bindjen se qeveria e ardhshme duhet ta vërë si prioritet urgjent zbatimin e këtyre projekteve, duke deklaruar se Kosova duhet të bëhet neto eksportuese e energjisë, duke ruajtur varësinë energjetike vetëm nga SHBA përmes infrastrukturës së gazit.