Deputeti i LDK-së, Avdullah Hoti, ka reaguar përmes një postimi në rrjetin social Facebook në lidhje me debatin mbi projektin e gazit amerikan në Kosovë. Hoti vlerësoi analizat e shumë mediave dhe analistëve, duke u dhënë të drejtë atyre se refuzimi i kësaj nisme nuk ka baza ekonomike.
Sipas Hoti, ky qëndrim buron nga një "agjendë e mbrapshtë antiamerikane", e cila dëmton interesat strategjike të vendit. Ai theksoi se ndjekja e këtyre agjendave minon drejtpërdrejt qëndrueshmërinë ekonomike dhe politike të Kosovës.
"Përgëzoj analistët e shumtë dhe mediat, të cilët po e sqarojnë në mënyrë profesionale dhe të pavarur se refuzimi i gazit amerikan nuk mbështetet në asnjë argument ekonomik, por në thelb buron nga një agjendë e mbrapshtë antiamerikane", shkroi Hoti.
Në fund të reagimit të tij, deputeti shtoi se është e qartë për opinionin publik se kujt i intereson kjo agjendë, duke ritheksuar rëndësinë e partneritetit me SHBA-në në sektorin e energjisë.