Një incident i rëndë ka ndodhur në Aeroportin Ndërkombëtar të Miamit, ku një avion mallrash Boeing 767-300 që operonte për Amazon Prime Air ka dalë nga pista pas uljes. Sipas Administratës Federale të Aviacionit (FAA), avioni kishte mbërritur nga Aeroporti Ndërkombëtar Luis Muñoz Marín në San Juan, Porto Riko.
Pas daljes nga pista, avioni është përplasur me disa automjete që ndodheshin në afërsi, duke shkaktuar shpërthimin e flakëve dhe përhapjen e tymit të dendur. Departamenti i Zjarrfikësve të Miami-Dade konfirmoi mbërritjen në vendngjarje të ekipeve të shpëtimit, me më shumë se 60 pjesëtarë të angazhuar në operacionin e shuarjes së zjarrit dhe ofrimit të ndihmës.
Autoritetet amerikane bënë të ditur se nga përplasja ka persona të lënduar, ndërsa vijojnë hetimet për përcaktimin e shkaqeve të sakta. Si masë paraprake, FAA ka urdhëruar mbylljen e përkohshme të të gjitha pistave dhe pezullimin e trafikut ajror në këtë aeroport, duke paralajmëruar vonesa dhe anulime të fluturimeve. Sekretari amerikan i Transportit, Sean Duffy, deklaroi se ekipet e reagimit po vlerësojnë gjendjen në vendin e ngjarjes.
Përditësime
Hetimet paraprake identifikuan pistën 30 të Aeroportit Ndërkombëtar të Miamit si vendin ku avioni Boeing 767-300 doli nga pista gjatë uljes. Autoritetet publikuan regjistrimin audio të komunikimit me kontrollin tokësor, i cili po analizohet për të përcaktuar shkaqet e incidentit. Raportimet e fundit nga terreni konfirmojnë se avioni ka rrëshqitur jashtë perimetrit të aeroportit, duke përfunduar në një rrugë publike përreth.
Autoritetet konfirmuan se aksidenti, që ndodhi rreth orës 14:00, ka shkaktuar të paktën 5 viktima. Regjistrimet audio nga kontrolli ajror tregojnë se pilotët nuk dërguan asnjë sinjal emergjence përpara uljes. Avioni dëmtoi sistemet e navigimit të aeroportit gjatë daljes nga pista. Pas ndërprerjes totale, autoritetet e hoqën pjesërisht ndalimin e lëvizjeve tokësore në orën 17:00, megjithatë vonesat në fluturime pritet të vazhdojnë deri të hënën.
Bilanci i aksidentit u rëndua në 5 persona të lënduar, 3 prej të cilëve ndodhen në gjendje kritike për jetën, pasi avioni Boeing 767-300 i kompanisë 21 Air doli nga pista. Disa nga të dëmtuarit ishin bllokuar brenda automjeteve të goditura në tokë nga përplasja. Operacioni i shpëtimit angazhoi 200 personel zjarrfikës, të cilët u përballën me vështirësi të shtuara për shkak të rrjedhjes së karburantit. Bordi Kombëtar i Sigurisë së Transportit (NTSB) ka nisur hetimet zyrtare mbi incidentin. Avioni i përfshirë në ngjarje rezulton i prodhuar në vitin 1994, ndërsa në vitin 2015 ishte konvertuar për transport mallrash.