Ekipi mbrojtës i kryetarit të Bashkisë së Tiranës, Erion Veliaj, përmes një konference për mediat këtë të enjte, shprehu kundërshtimin ndaj masës së sigurimit personal “arrest me burg”. Avokati Plarent Ndreca dhe përfaqësuesi ndërkombëtar Ben Brandon bënë të ditur se po përgatisin një aplikim për në Gjykatën Evropiane të të Drejtave të Njeriut (GJEDNJ) në Strasburg, për shkak të asaj që ata e konsiderojnë si shkelje të standardeve dhe vonesa të pajustifikuara në procesin gjyqësor.
Sipas avokatit Plarent Ndreca, vonesa prej 9 muajsh në shqyrtimin e çështjes nga Gjykata e Lartë, pavarësisht urdhrit për përshpejtim nga Gjykata Kushtetuese, përbën një problem serioz. Mbrojtja argumentoi se nuk ekzistojnë më rrethana që justifikojnë mbajtjen e Veliajt në burg dhe se kjo masë cënon të drejtën e tij për të ushtruar detyrën, si dhe interesin e qytetarëve të Tiranës. Nga ana tjetër, avokati britanik Ben Brandon theksoi vështirësitë në komunikimin me klientin, duke pretenduar se për 14 muaj i është mohuar e drejta për ta takuar.
Ndërkohë, çështja për masën e sigurimit është rikthyer nga Gjykata Kushtetuese për rishqyrtim në Gjykatën e Lartë, me kërkesën për të arsyetuar nevojën e masës “arrest me burg”. Seanca e radhës është caktuar për në datën 15 shtator, në orën 09:30. Trupa gjykuese do të përbëhet nga Sander Simoni (relator), si dhe Valbon Çekrezi e Genti Shala (anëtarë). Më parë, gjyqtarët Sokol Binaj, Albana Boksi dhe Ilir Panda janë tërhequr nga shqyrtimi për shkak të përfshirjes së mëparshme në të njëjtën çështje.
Përditësime
Avokatët anglezë zhvilluan një takim fizik me Erion Veliajn në paraburgimin e Durrësit, pas një vonese prej afro 18 muajsh. Ekipi mbrojtës ndërkombëtar është aktualisht në pritje të autorizimit për një takim koordinues me avokatët amerikanë që asistojnë në çështje. Gjykata e Lartë njoftoi se seanca e datës 15 shtator do të zhvillohet në dhomë këshillimi.
Avokati Plarent Ndreca i është drejtuar Gjykatës së Lartë me dy kërkesa për përshpejtimin e shqyrtimit të masës së sigurisë ndaj kryebashkiakut Erion Veliaj. Mbrojtja argumenton se vonesa prej 16 muajsh ka cenuar procesin gjyqësor, ndërsa thekson se pamundësia e Veliajt për të ushtruar detyrën po dëmton funksionimin e Bashkisë së Tiranës. Në rast të mosreflektimit nga gjykata, mbrojtja ka paralajmëruar ankimim në Gjykatën e Strasburgut.