Një ekip nga zyra e Avokatit të Popullit po zhvillon një inspektim 3-ditor në Burgun e Reçit në Shkodër, një prej institucioneve më të mëdha të ekzekutimit të vendimeve penale në vend. Gjatë vizitës, Avokati i Popullit, Endrit Shabani, i shoqëruar nga Komisioneri për Parandalimin e Torturës, Ahmet Prençi, vlerësuan nga afër kushtet dhe zhvilluan biseda me të dënuarit dhe personelin.
Në deklaratën pas inspektimit, Shabani vuri në dukje se, përkundër faktit që Burgu i Reçit është një strukturë e re, sistemi vijon të përballet me mangësi të trashëguara. Sipas tij, institucioni dështon në ofrimin e shërbimeve të mirëfillta rehabilituese, duke penguar procesin e riintegrimit të të dënuarve përmes programeve sociale dhe edukuese.
Lidhur me situatën shëndetësore, Avokati i Popullit kërkoi ndërhyrje të menjëhershme në infrastrukturë, me qëllim garantimin e kushteve humane për të dënuarit dhe personelin. Ky shqetësim pason ankesa të ndryshme, përfshirë ato për rastet e vdekjeve në sistemin e burgjeve.
Një tjetër çështje e ngritur nga Endrit Shabani është zbatimi i ligjit për amnistinë. Ai denoncoi pengesat burokratike që po penalizojnë të burgosurit, të cilët, megjithëse plotësojnë kriteret ligjore, nuk përfitojnë nga amnistia për shkak të vonesave në zbardhjen e vendimeve gjyqësore.
Ekipi i Avokatit të Popullit do të vazhdojë monitorimin në terren. Pas përfundimit të procedurave, institucioni ka paralajmëruar publikimin e gjetjeve dhe rekomandimeve zyrtare për përmirësimin e gjendjes në këtë burg.