Avokati kosovar Arianit Koci ka reaguar lidhur me aksidentin tragjik në një segment të autostradës Shkup-Bllacë, ku mbetën të vdekur tre persona. Përmes një njoftimi, ai bëri të ditur se është angazhuar për të përfaqësuar familjarët e të ndjerëve: Ejup Tërnavës, Xhenet Tërnavës dhe Fatmire Shabanit.
Sipas avokatit, segmenti ku ndodhi ngjarja kishte qenë zyrtarisht i mbyllur për qarkullim, por nuk ishte i bllokuar fizikisht për automjetet. Në kërkesën e tij për zbardhjen e rrethanave të këtij rasti, Koci ka parashtruar disa çështje thelbësore drejtuar autoriteteve të Maqedonisë së Veriut:
- Cila ndërmarrje ka kryer ndërtimin e segmentit dhe kush ka mbikëqyrur punimet?
- Kush ka qenë përgjegjës për sigurimin e zonës?
- Përse hyrja në këtë segment nuk ka qenë e bllokuar fizikisht përpara aksidentit?
Koci ka vërejtur se, pas ngjarjes, autoritetet kanë ndërhyrë duke bllokuar fizikisht hyrjen me zhavorr dhe duke vendosur shenja të komunikacionit, duke ngritur pyetjen nëse këto masa mund të ishin ndërmarrë më herët për të shmangur tragjedinë. Ai theksoi se gjatë vizitës në Policinë e Maqedonisë së Veriut, nuk ka marrë përgjigje për këto çështje, ndërsa nuk ka asnjë informacion zyrtar për ndonjë person të ndaluar lidhur me hetimin.
Përveç neglizhencës së dyshuar në sigurinë rrugore, Koci ka kritikuar edhe mungesën e mbështetjes institucionale për familjarët e viktimave, të cilët janë detyruar të paguajnë 2,800 euro për transportin e trupave nga Maqedonia e Veriut për në Kosovë. Ai kërkoi që shteti të kishte marrë përsipër këto shpenzime për familjet e dëmtuara.
Përditësime
Avokati Arianit Koci u ka bërë thirrje qytetarëve të dorëzojnë çdo dëshmi apo dokumentacion që mund të ndihmojë në zbardhjen e aksidentit të 19 korrikut. Hetimet paraprake tregojnë se në segmentin e autostradës Shkup-Bllacë ekzistonin dy hyrje, ku vetëm njëra ishte e bllokuar, duke ngritur dyshime për mangësi serioze në sigurinë e këtij aksi rrugor.