Ministri në detyrë i Infrastrukturës dhe Transportit, Dimal Basha, ka publikuar gjetjet zyrtare lidhur me aksidentin fatal të ndodhur më 14 qershor në autostradën “Dr. Ibrahim Rugova”, ku humbi jetën një qytetare. Duke iu referuar raportit të Polisisë së Kosovës, ministri deklaroi se shkaku i tragjedisë ishte humbja e kontrollit të automjetit nga drejtuesi i tij.
Sipas raportit, automjeti ka goditur fillimisht sinjalizimin rrugor dhe më pas elementet mbrojtëse anësore. Basha theksoi se të dy shiritat e qarkullimit ishin të lirë për lëvizje në momentin e ngjarjes dhe se gjendja e rrugës nuk ka ndikuar në shkaktimin e aksidentit.
Në reagimin e tij, ministri u shprehu ngushëllime familjarëve të viktimës dhe njëkohësisht u përgjigj ndaj akuzave të adresuara ministrisë. Ai kritikoi qarqe të caktuara politike dhe media për tentativën e shfrytëzimit të kësaj tragjedie për propagandë, duke pretenduar se aksidenti ishte pasojë e rrëshqitjeve të dheut apo neglizhencës institucionale. Basha deklaroi se këto pretendime janë hedhur poshtë nga faktet zyrtare të organeve kompetente dhe bëri thirrje që tragjedi të tilla të mos përdoren për përfitime politike ose mediatike.