Avokati Arianit Koci ka publikuar një njoftim për të gjithë shtetasit e Kosovës që planifikojnë të kalojnë transit ose të qëndrojnë në territorin e Serbisë. Përmes një reagimi në rrjetin social Facebook, ai theksoi se aktiviteti i qytetarëve në internet mund të tërheqë vëmendjen e autoriteteve atje.
Sipas Kocit, komentet, postimet apo çdo përmbajtje tjetër në forume dhe platforma publike, të cilat mund të vlerësohen si kërcënuese, fyese ose nxitëse të urrejtjes, mund të sjellin pasoja juridike për udhëtarët. Në këto raste, qytetarët rrezikojnë të ndalohen për intervistim ose të nisin ndaj tyre procedura penale apo kundërvajtëse, varësisht nga legjislacioni që zbatohet në Serbi.
Apeli i avokatit synon vetëdijesimin e qytetarëve për rreziqet e mundshme ligjore që lidhen me gjurmët e tyre digjitale gjatë kalimit nëpër këtë shtet.