Kryetari i Sindikatës së Sektorit Privat, Jusuf Azemi, u është drejtuar institucioneve qendrore me një kërkesë zyrtare për të sqaruar afatet kohore të pagesës prej 100 eurosh për punëtorët e sektorit privat. Kjo mbështetje financiare është parashikuar të shpërndahet në kuadër të Pakos për Përballje me Inflacionin 2.0, të miratuar nga Qeveria e Republikës së Kosovës.
Në shkresën drejtuar kryeministrit në detyrë, Albin Kurti, dhe ministrit në detyrë të Financave, Hekuran Murati, theksohet se Federata Sindikale e Punëtorëve Teknikë të Sektorit Privat të Kosovës po përballet me kërkesa të shumta nga punëtorët lidhur me procedurat dhe kohën e ekzekutimit të mjeteve. Sindikata u ka kërkuar institucioneve përkatëse që të njoftojnë zyrtarisht përfituesit për periudhën kur pritet të realizohet kjo pagesë.