Ministri në detyrë i Financave, Hekuran Murati, njoftoi se janë ekzekutuar pagesat prej 100 eurosh për punëtorët e sektorit privat që kanë përmbushur kriteret e përcaktuara në kuadër të Pakos për Përballje me Inflacionin 2.0. Ky vendim, i cili u zyrtarizua në mbledhjen e qeverisë më 22 maj, është ndërmarrë për të zbutur efektet e inflacionit.
Sipas të dhënave zyrtare, nga kjo masë kanë përfituar punëtorët me të ardhura mujore bruto deri në 1,000 euro. Kostoja për mbështetjen e këtij sektori kap vlerën e rreth 25 milionë eurove, ndërsa totali i pakos arrin në 105 milionë euro.
Në lidhje me mbështetjen për studentët, ministri Murati deklaroi se komisioni vlerësues është duke shqyrtuar aplikimet dhe do të njoftojë publikun sapo listat të jenë gati. Për këtë kategori janë alokuar 7 milionë euro për 70 mijë studentë, ndërsa rreth 73 milionë euro të tjera janë destinuar për përfituesit e skemave sociale dhe mbi 405 mijë fëmijë.