Ministri i Financave, Hekuran Murati, ka njoftuar zyrtarisht se shteti ka ekzekutuar pagesat e njëhershme prej 100 eurosh për studentët që kanë plotësuar kriteret e përcaktuara. Procesi është realizuar pas verifikimeve të kryera nga institucionet e arsimit të lartë dhe finalizimit të listës nga komisioni përkatës.
Kjo masë është pjesë e Pakos për Përballje me Inflacionin 2.0, e miratuar nga Qeveria në mbledhjen e datës 22 maj. Kostoja totale e pakos, e cila përfshin mbështetjen për kategori të ndryshme sociale, arrin vlerën e 105 milionë eurove.
Sipas të dhënave zyrtare, përveç studentëve, nga kjo pako kanë përfituar edhe punëtorët e sektorit privat, si dhe mbi 322 mijë përfitues të skemave sociale dhe mbi 405 mijë fëmijë, për të cilët janë alokuar rreth 73 milionë euro. Për mbështetjen e 70 mijë studentëve janë ndarë në total 7 milionë euro. Mjetet pritet të jenë në dispozicion të përfituesve në llogaritë e tyre bankare pas procesimit të pagesave nga institucionet përkatëse.