Ministri i Financave, Punës dhe Transfereve, Hekuran Murati, ka bërë të ditur se më 31 mars 2026, përveç pagës së 13-të për të punësuarit në sektorin publik që paguhen nga buxheti i shtetit, janë ekzekutuar edhe pagat e rregullta me shtesën e rritur të përvojës së punës.
Sipas deklaratës së tij në rrjetet sociale, shtesa për përvojën e punës është rritur nga 0.25% në 0.50% për 15 vitet e para të përvojës. Kjo rritje përbën përmirësim efektiv të pagës për të gjithë të punësuarit në sektorin publik.
Murati theksoi se shtesa e rritur është aplikuar edhe retroaktivisht për muajt janar dhe shkurt 2026.
Sa i përket grave në pushim lehonije që mund të mos kenë marrë paganë e 13-të, ai u kërkoi atyre të drejtohen te menaxhmenti i institucionit ku punojnë. Listat e pagave përgatiten nga secili institucion përkatës, i cili është përgjegjës për lëshimet eventuale. Këto lëshime mund të korrigjohen në muajin vijues.