Ministri i Financave, Hekuran Murati, sqaroi se të punësuarat në pushim lehonie gjatë 12 muajve të fundit u llogaritet koha e kaluar si punë me orar të plotë. Prandaj, ato u takon paga e 13-të e plotë.
Sipas tij, gratë që nuk e kanë marrë këtë pagesë duhet të paraqesin ankesë te institucionit ku janë të punësuara. Kjo për shkak të mundësisë së deklarimit të gabuar nga ana e institucioneve, që nuk i kanë regjistruar ato si në pushim lehonie. Murati theksoi se gabimi mund të korrigjohet dhe paga do të ekzekutohet në muajin e ardhshëm.
"Të punësuarat që janë në pushim të lehonisë përgjatë periudhës u llogaritet sikur të kenë punuar me orar të plotë. Prandaj, u takon paga e 13-të. I inkurajoj që të paraqesin ankesë te institucionet ku janë të punësuara sepse shpesh varet se si është deklaruar nga institucioni", tha Murati pas mbledhjes së Komisionit për Buxhet.
Paga e 13-të u ekzekutua më 31 mars për rreth 85 mijë punonjës të sektorit publik në Kosovë. Ajo u nda me vendim të Qeverisë të hënën e kaluar. Punonjësit që kishin mbushur 12 muaj punë e morën të plotë, ndërsa të tjerët proporcionalisht.
Kjo pagë ishte premtuar nga kryeministri Albin Kurti gjatë fushatës për zgjedhjet e 28 dhjetorit 2025 dhe u përfshi në buxhetin e vitit 2026.