Kryetari i Sindikatës së Pavarur të Sektorit Privat, Jusuf Azemi, në një intervistë për Ekonomia Online, ka vlerësuar se siguria në punë mbetet një prej çështjeve më prioritare për shoqërinë. Sipas tij, institucionet përgjegjëse nuk po ofrojnë mbrojtjen e nevojshme për punëtorët.
Azemi deklaroi se institucionet nuk janë në nivelin e duhur dhe në shumë raste punëtorët "i ruan vetëm Zoti". Ai theksoi se institucionet nuk po bëjnë as minimumin e detyrimeve të tyre për mbrojtjen e ligjit dhe të të drejtave të punëtorëve.
Në lidhje me shkaqet e kësaj gjendjeje, Azemi fajësoi në radhë të parë pronarët e kompanive, të cilët sipas tij nuk e vlerësojnë rrezikshmërinë në vendet e punës dhe nuk ndërmarrin masat parandaluese të kërkuara. Ai shtoi se rreth 90 për qind e punëdhënësve në sektorin privat nuk e zbatojnë Ligjin për Sigurinë dhe Shëndetin në Punë.
Kreu i sindikatës u bëri thirrje instancave shtetërore, veçanërisht Inspektoratit të Punës dhe Ministrisë së Punës, që të shtojnë kontrollet dhe të sigurojnë zbatimin e rregulloreve për të mbrojtur jetën e punonjësve.