Në Kosovë, sektori i ndërtimtarisë paraqet rrezikun më të lartë për sigurinë e punëtorëve. Gjatë vitit 2025, u evidentuan 19 raste me fatalitet në vendin e punës, nga të cilat 11 në ndërtimtari.
Sipas të dhënave, gjatë tetë viteve të fundit kanë vdekur mbi 160 punëtorë në kushte pune. Sindikata e Punëtorëve Teknikë dhe ajo e sektorit privat shprehin shqetësim për kushtet e punës, veçanërisht në ndërtimtari dhe fusha të tjera industriale.
Inspektorati Qendror i Punës ka kryer inspektime të vazhdueshme, me prioritet sektorin e ndërtimtarisë për shkak të rrezikshmërisë së lartë. Gjatë 2025-s, u shqiptuan 1.747 masa ndëshkimore ndaj subjekteve që nuk kanë zbatuar legjislacionin për sigurinë. Ushtruesi i detyrës së drejtorit ekzekutiv, Vesel Zhinipotoku, deklaroi se inspektimet kanë konstatuar mungesë të masave mbrojtëse dhe të obligimeve të tjera në vendpunishte ndërtimore.
Përkundër përpjekjeve për përmirësimin e kushteve, mosrespektimi i ligjit vazhdon të jetë problem kryesor. Inspektorati bazohet në planin e punës dhe vlerësimin e rrezikshmërisë për të realizuar kontrollat.