Sindikata e Punëtorëve të Sektorit Privat të Kosovës (SPSPK) raporton se gjatë vitit 2025 kanë humbur jetën 32 persona në vendin e punës, ndërsa rreth 2000 të tjerë janë lënduar.
Inspektorati Qendror i Punës raporton numër gati përgjysmë më të ulët se ai i sindikatës. Ky institucion vlerëson se ndërtimtaria mbetet sektori më i pasigurt.
Sindikata dhe Inspektorati bien dakord se mungesa e kushteve të sigurta dhe të shëndetshme në punë është ndër shkaqet kryesore të vdekjeve dhe lëndimeve.
Mungesa e sistemit të sigurimeve shëndetësore është barrë e madhe për punëtorët, të cilët detyrohen të mbulojnë vetë shpenzimet e shërimit. Jusuf Azemi, kryetar i SPSPK-së, ngre dyshime se pas ngecjes së këtij projekti 12-vjeçar mund të fshihet mafia shëndetësore.
Ai akuzon qeveritë e mëparshme dhe atë aktuale se, pavarësisht zotimeve, nuk kanë zbatur Ligjin për Sigurime Shëndetësore. Azemi vlerëson se ky ligj, në formën e tij aktuale, nuk mbron interesat e punëtorëve dhe nuk përfshin klasifikimin e sëmundjeve profesionale.
Sipas tij, mungesa e sigurimeve shëndetësore është shkaku më i shpeshtë i ikjes së punëtorëve jashtë vendit.