Komisioni për Integrim Evropian, i kryesuar nga Hykmete Bajrami, priti në takim më 26 shkurt Zuzana Michalcová Šutiaková, shefe e Divizionit për Ballkanin Perëndimor dhe Evropën Juglindore në Shërbimin Evropian për Veprimin e Jashtëm (EEAS).
Gjatë takimit u diskutua rëndësia e bashkëpunimit të mëtejmë për përmbushjen e detyrimeve nga Plani i Rritjes së BE-së.
Hykmete Bajrami theksoi përkushtimin e Komisionit për integrimin evropian dhe siguroi mysafiren për angazhimin e sinqertë. Ajo kërkoi përkrahje të mëtejme nga përfaqësuesit dhe mekanizmat e BE-së në Kosovë, heqjen e plotë të masave ndaj Kosovës si dhe anëtarësimin e vendit në organizata dhe forume ndërkombëtare.
Zuzana Michalcová Šutiaková vlerësoi orientimin gjeostrategjik të Kosovës dhe rolin e Komisionit në përmbushjen e detyrimeve të integrimit. Ajo konfirmoi gatishmërinë e BE-së për të vazhduar mbështetjen ndaj Kosovës në procesin e integrimit evropian.