Në mbledhjen e 23 janarit 2026 të Komisionit për Çështjet Europiane dhe Punët e Jashtme u diskutuan ndryshimet në Kodin Penal, veçanërisht për veprën penale të shpifjes.
Kryetari i Grupit Parlamentar të Partisë Socialiste, Taulant Balla, deklaroi se propozimet e mazhorancës synojnë dekriminalizimin e shpifjes për gazetarët profesionistë, por jo për profesionistët e shpifjes. Sipas tij, këto ndryshime dallojnë gazetarin profesionist nga vetëshpallja dhe zbatohen për median e regjistruar.
Balla sqaroi se një gazetar i punësuar ose i vetëpunësuar, i regjistruar ligjërisht, nuk mbart përgjegjësi penale për shpifje nëse vepron me mirëbesim, synon informimin e publikut për çështje me interes të përgjithshëm dhe ka bërë përpjekje të arsyeshme për verifikimin e të dhënave. Këto masa janë vlerësuar pozitivisht nga Komisioni Europian dhe garantojnë mbrojtjen e publikut si dhe standardet europiane në fushën e informimit.
Sa i përket fyerjes, Balla shprehu qëndrimin personal se nuk e heq nga Kodi Penal, duke e cilësuar si vepër penale të dënueshme me gjobë, jo me burg. Ai përmendi mbështetjen e tij për dënimet më të ashpra për fyerjet me motive raciste ose ksenofobe nëpërmjet sistemeve kompjuterike, siç u miratuan në vitin 2008. Sipas tij, asnjë vend europian nuk e ka hequr fyerjen nga Kodi Penal.
Balla iu referua edhe propozimeve të deputetes Tabaku (nenet 237–238-a), duke thënë se ato përputhen me ato të qeverisë dhe mund të miratohen bashkë në seancën plenare.