Gjatë protestës së zhvilluar një ditë më parë para ndërtesës së Kuvendit të Shqipërisë, e cila u shoqërua me tensione midis pjesëmarrësve dhe forcave të rendit, u regjistrua një episod që tërhoqi vëmendjen e përfaqësuesve politikë. Kreu i Grupit Parlamentar të Partisë Socialiste, Taulant Balla, publikoi pamje filmike ku shihet një protestues duke fshirë fytyrën e një efektivi të policisë me flamurin kuq e zi.
Në reagimin e tij, Balla u shpreh kritik ndaj përdorimit të flamurit kombëtar në këtë mënyrë, duke e cilësuar si të papranueshëm. Ai gjithashtu adresoi reagimet e disa figurave publike në rrjetet sociale, të cilët e kishin cilësuar veprimin e protestuesit si një gjest pozitiv. Balla theksoi se protestuesi që ndërmori pastrimin mund të ketë qenë i njëjti person që hodhi lëndën e paidentifikuar (vezë apo miell) mbi efektivin.
"Po shoh që influencerat e protestës po e përshëndesin këtë akt. Dakord, duhet përshëndetur edhe pse ai që e fshin është njëri prej atyre që e ka hedhur lëndën, nëse nuk është ai vetë. Megjithatë, reflektimi dhe ndjesa janë të mirëpritura. Por, unë kam diçka tjetër: si mund ta përdorësh flamurin kombëtar kuq e zi si peshqir?", shkruan Balla në reagimin e tij.