Shefi i Grupit Parlamentar të Partisë Socialiste, Taulant Balla, gjatë një diskutimi ka rishprehur qëndrimin zyrtar të Kuvendit të Shqipërisë lidhur me aktgjykimin e Gjykatës në Hagë ndaj katër ish-udhëheqësve të Ushtrisë Çlirimtare të Kosovës. Balla deklaroi se Kuvendi i Shqipërisë shpreh indinjatën e thellë dhe mosdakordësinë e plotë me këtë vendim, duke e vlerësuar atë si thellësisht të padrejtë.
Sipas Ballës, ky institucion rithekson një të vërtetë historike që nuk mund të relativizohet, duke argumentuar se lufta e UÇK-së ishte një përpjekje për lirinë dhe çlirimin e Kosovës. Ai shtoi se kjo luftë përfaqësonte përpjekjen e një populli për t’i dhënë fund represionit, dhunës dhe përndjekjes, me synim sigurimin e së drejtës për të jetuar të lirë për të gjitha kombësitë në Kosovë.
Në fjalën e tij, Balla vlerësoi se Ushtria Çlirimtare e Kosovës u krijua si përgjigje ndaj represionit sistematik, dhunës, spastrimit etnik dhe gjenocidit që u krye nga regjimi i Sllobodan Millosheviqit.