Kryeqyteti i Tajlandës, Bangkok, është përfshirë nga përmbytje të mëdha pas reshjeve të dendura të pandërprera. Guvernatori i kryeqytetit, Chadchart Sittipunt, ka shpallur qytetin zonë të prekur nga fatkeqësia, masë kjo që mundëson koordinim më të shpejtë midis Administratës Metropolitane të Bangkokut dhe agjencive shtetërore.
Gjatë kësaj periudhe, në Bangkok janë regjistruar rreth 300 milimetra shi, ndërsa pamjet nga terreni shfaqin rrugë të mbuluara nga uji dhe vështirësi të theksuara në qarkullimin e automjeteve. Bangkoku lindor raportohet si një ndër zonat më të goditura nga kjo situatë.
Departamenti Meteorologjik bëri të ditur se moti i paqëndrueshëm është rezultat i një sistemi me presion të ulët mbi Rrafshnaltën e Poshtme Qendrore, si dhe forcimit të musonit jugperëndimor mbi Detin Andaman dhe Gjirin e Tajlandës. Banorët janë paralajmëruar përmes telefonave celularë për rritjen e niveleve të ujit në kanalet kulluese. Stacionet e pompimit po funksionojnë me kapacitet të plotë, ndërsa autoritetet vlerësojnë se përmbytjet mund të tërhiqen brenda 6 orësh nëse reshjet ndërpriten. Megjithatë, parashikimet meteorologjike tregojnë se moti i lig do të vazhdojë deri të dielën, çka ka nxitur qytetarët në disa lagje të krijojnë rezerva me artikuj bazë.