Në një raport të publikuar së fundmi, Banka Botërore vlerëson se sistemi shëndetësor në Shqipëri ka nevojë për një kthesë rrënjësore në mënyrën e financimit. Aktualisht, Fondi i Sigurimit të Detyrueshëm të Kujdesit Shëndetësor (FSDKSH) vepron kryesisht si administrator buxheti, duke financuar spitalet publike mbi bazën e shpenzimeve historike dhe jo në raport me cilësinë apo sasinë e shërbimeve të ofruara.
Sipas raportit, ky model aktual nuk ofron stimujt e nevojshëm për të rritur produktivitetin apo për të racionalizuar kostot. Banka vëren se problemi kryesor qëndron te mungesa e kapaciteteve për blerje strategjike të shërbimeve.
Për të rritur efikasitetin, Banka Botërore rekomandon këto ndërhyrje:
• Zbatimin e blerjes së shërbimeve të bazuara në rezultate në të gjitha nivelet e kujdesit shëndetësor, paralelisht me rritjen e autonomisë spitalore.
• Për kujdesin parësor, kalimin në pagesa të bazuara në kapitacion, të personalizuara sipas moshës dhe rrezikut të pacientëve.
• Përfshirjen e fondeve të dedikuara për diagnostikën laboratorike dhe instrumentale, të shoqëruara me tregues performance.
• Kontraktimin strategjik të ofruesve publikë për shërbimet ambulatore të specializuara, për të garantuar ofrimin e shërbimeve sipas standardeve të përcaktuara.
Përditësime
Banka Botërore rekomandoi sot një model të ri financimi për spitalet në Shqipëri, në përputhje me Planin Kombëtar të Spitaleve 2023–2030. Ekspertët sugjerojnë vendosjen e kufijve buxhetorë për shërbimet ambulatore për të frenuar zgjerimin e panevojshëm të tyre. Gjithashtu, kërkohet adoptimi i një skeme pagesash për ofruesit publikë, që të përafrohet me modelet aktuale të partneriteteve publiko-private.