Banorët e fshatit Mirakë dhe të zonave përreth në Njësitë Administrative Polis dhe Valë kanë njoftuar një protestë për mëngjesin e së hënës, në orën 09:00, për të kundërshtuar hartimin aktual të projektit të zgjerimit të segmentit Elbasan–Qafë Thanë, pjesë e Korridorit VIII. Banorët theksojnë se nuk janë kundër ndërtimit të rrugës, por kërkojnë ndërtimin e një hyrje-daljeje në karrexhatën e majtë, pranë urës së Mirakës.
Sipas qytetarëve, mungesa e një aksesi të drejtpërdrejtë drejt aksit kryesor do të izolojë rreth 6 mijë banorë të fshatrave Mirakë, Gostimë, Qendër, Gurshpatë, Vilan, Sheh dhe Valë. Në kërkesën zyrtare drejtuar Autoritetit Rrugor Shqiptar (ARRSH) më 9 korrik 2026, ata propozuan krijimin e lidhjes në kilometrat 5+400 dhe 5+800. Banorët argumentojnë se itinerari aktual përmes Nyjës së Xibrakës shton 6 kilometra rrugë, ndërsa vonesat për ambulancat në raste urgjencash shëndetësore mund të arrijnë nga 15 deri në 20 minuta.
Në një përgjigje zyrtare të datës 22 korrik 2026, ARRSH, nëpërmjet drejtorit të përgjithshëm Ami Kozeli, bëri me dije se projekti po zbatohet sipas variantit të miratuar dhe standardeve të sigurisë. Institucioni sqaroi se lidhja me aksin kryesor është parashikuar përmes rrugëve ekzistuese dhe Nyjës së Xibrakës. Megjithatë, duke marrë parasysh shqetësimet e komunitetit, ARRSH njoftoi se do të shqyrtojë mundësinë e një zgjidhjeje tjetër teknike, e cila do t'i nënshtrohet vlerësimit të sigurisë rrugore dhe kushteve të terrenit. Banorët kanë deklaruar se kjo protestë do të jetë hapi i parë drejt reagimeve të mëtejshme deri në gjetjen e një zgjidhjeje funksionale.