Prokuroria e Elbasanit ka filluar me iniciativë të saj hetimet për dëmtimet në aksin rrugor Librazhd-Pogradec, të cilat që të shtunën kanë bllokuar tërësisht qarkullimin për automjete dhe këmbësorë. Ngjarja ka ndodhur në zonën Arrat e Gurrës, fshati Dragostunjë i Librazhdit, kryesisht në Lotin 7 të këtij aksi.
Hetimet janë regjistruar për veprat penale Shpërdorim i detyrës, Shkelje e barazisë në tendera apo ankande publike, Shkatërrimi i rrugës dhe Ndotja e ajrit, ujit apo tokës. Për këtë qëllim është krijuar një grup hetimor.
Dëmtimet janë shkaktuar nga rrëshqitje toke, lëvizje shkëmbinjsh dhe dherash, si dhe probleme gjeologjike. Ura në segmentin e prekur ka pësuar degradim të rëndë, me zhvendosje prej 40 cm, dhe është shpallur e pakalueshme. Drejtori i Autoritetit Rrugor Shqiptar (ARRSH), Ami Kozeli, ka deklaruar se ura do të demontohet, ndërsa kompania A. N. K., në pronësi të Agim Kolës, po kryen punime për pastrimin e aksit.
Kozeli ka shpjeguar se shkaqet lidhen me reshje intensive, erozion lumor dhe lëvizje tektonike në zonë ujëmbajtëse. Ai ka mohuar dyshimet për ndikim nga gërryesat e një kompanie inertesh apo punimet në aksin Elbasan-Qafë Thanë, duke theksuar se kompania ka leje të rregullta. Për zgjidhje përfundimtare priten të dhënat nga Shërbimi Gjeologjik.
Situata është përkeqësuar: prej tre ditësh qarkullimi kryhej me vështirësi në një korsi, ndërsa tani aksi është i bllokuar plotësisht prej mbi 48 orësh. Bypass-i provizor është dëmtuar gjithashtu. ARRSH synon hapjen e aksit nesër, pas punimeve intensive.
Deri në normalizim, drejtuesit e mjeteve ndjekin devijimet:
• Maliq – Lozhan – Strelc – Gramsh – Elbasan;
• Qafë Thanë – Pogradec – Korçë – Leskovik – Përmet – Tepelenë;
• Për mjete të tonazhit të rëndë: Qafë Thanë – Maqedoni dhe Bllatë – Rruga e Arbërit.
Këto devijime shtojnë distancën drejt Korçës me rreth një orë dhe kalojnë nëpër rrugë të amortizuara.