Situata në vendin Arrat e Gurrës, në aksin rrugor Librazhd–Pogradec, është përkeqësuar ndjeshëm gjatë orëve të fundit për shkak të rrëshqitjes së dherave.
Autoriteti Rrugor Shqiptar (ARRSH), pas vlerësimit në terren dhe në koordinim me Policinë e Shtetit, ka vendosur ndalimin e qarkullimit të mjeteve të tonazhit të rëndë dhe të autobusëve në këtë segment deri në një njoftim të dytë. Kjo masë synon parandalimin e rreziqeve për drejtuesit e mjeteve dhe garantimin e sigurisë së përdoruesve të rrugës.
Autoritetet u bëjnë thirrje drejtuesve të mjeteve të tonazhit të rëndë dhe operatorëve të transportit të shmangin këtë aks dhe të përdorin rrugë alternative deri në stabilizimin e plotë të situatës. ARRSH kërkon mirëkuptimin e përdoruesve të rrugës, duke theksuar se çdo veprim ka për qëllim vetëm mbrojtjen e jetës dhe shmangien e incidenteve të mundshme.
Ky njoftim vjen në vijim të një komunikimi të mëparshëm për të njëjtin segment rrugor.
Përditësime
Autoritetet kanë zgjeruar ndalimin e qarkullimit në aksin Librazhd–Pogradec për të gjitha mjetet.
Sipas Drejtorit Ami Kozeli, situata është mbikëqyrur prej javësh, me përkeqësim në 48 orët e fundit. Sot në mëngjes u mbajt një mbledhje për planin e një bypass provizor në krah të skarpatës.
Problemet në urë:
- Thërmohet betoni;
- Spostim nga 27 cm në 29 cm;
- Rrezik shembjeje.
Rruga alternative: Maliq–Lozhan–Moglicë–Gramsh–Elbasan.
Lejohet kalimi vetëm për ambulanca, zjarrfikëse dhe forca policore; autokolonat arrijnë deri në 2-3 km.
Drejtori Ami Kozeli deklaroi se ura është spostuar nga 27 cm në 29 cm, betoni po thërmohet vazhdimisht dhe qarkullimi mbetet i bllokuar plotësisht për të gjitha mjetet.
Autoritetet kanë nisur ndërtimin e një bypass-i provizor.
Shkaqet kryesore: zona ujëmbajtëse "Ligata e Bicës" dhe gërryerja nga lumi poshtë urës.
Autoritetet kërkojnë shmangie të plotë të aksit për shkak të fluksit drejt Korçës gjatë fundjavës.