Në zonën e Porto-Romanos në Durrës, banorët jetojnë me shqetësim të vazhdueshëm që prej nëntorit të vitit 2024, kur mijëra tonelata mbetje të rrezikshme u depozituan në një magazine në afërsi të objektit Eco Parku.
Këto mbetje ndodhen rreth 40 metra në distancë ajrore nga shtëpitë e banorëve. Gani Braho, 67 vjeç, thotë se ndihet më i rrezikuar se të tjerët. “Kam frikë për shëndetin e familjes, por nuk kam se ku të shkoj,” tha ai për BIRN. “Asnjëherë nuk jemi ndjerë pjesë e qytetit, edhe pse jemi afër tij. Tani kemi mbetjet pranë derës,” shtoi Braho.
Lagjja bën pjesë administrative në Katundin e Ri. Shumica e familjeve u vendosën aty dekada më parë, pasi u zhvendosën nga veriu i vendit në kërkim të një jete më të mirë.
Kontejnerët janë vendosur në një pronë të menaxhuar nga Agjencia e Administrimit të Pasurive të Sekuestruara dhe Konfiskuara. Ato përmbajnë mbi 2800 ton mbetje të rrezikshme, me origjinë nga hiri i oxhaqeve të kompanisë së prodhimit të çelikut Kurum.
Analizat laboratorike të kryera në Itali konfirmojnë se materialet i përkasin pluhurit të furrës elektrike të çelikut. Ky material klasifikohet si mbetje e rrezikshme për shkak të përmbajtjes së metaleve të rënda, si zinku, hekuri, plumbi dhe bakri.
Sipas Prokurorisë së Durrësit, mbetjet u eksportuan në kundërshtim me legjislacionin në fuqi dhe konventat ndërkombëtare për trajtimin e mbetjeve të rrezikshme. Kontejnerët u sekuestruan menjëherë pas kthimit në Shqipëri dhe u vendosën në zonën e Porto-Romanos.
Halit Braha, 70 vjeç, tregon se familja e tij u vendos në Porto-Romanos rreth 30 vite më parë për t’i shpëtuar përmbytjeve në Kukës. “Më parë kishim çështjen e kanalizimeve. Sa herë bllokoheshin, përmbytej zona dhe na sillnin ndotje. Tani na kanë sjellë mbetjet tek dera, që një Zot e di se çfarë janë,” thotë ai me shqetësim.
Banorët kërkojnë zgjidhje të menjëhershme për largimin e mbetjeve nga zona.