Mëngjesin e së dielës nisi zhvendosja e 102 kontejnerëve me mbetje të dyshuara toksike të kompanisë Kurum nga Porto Romano në fshatin Vrinë, pranë Shënavlashit. Këto kontejnerë kishin qëndruar aty për më shumë se një vit.
Destinacioni i ri ndodhet në afërsi të pallateve të ndërtuara për familjet e prekura nga tërmeti. Procesi zhvillohet me urdhër të Prokurorisë dhe nën mbikëqyrjen e autoriteteve, për të garantuar menaxhimin e sigurt të materialeve dhe vijimin e procedurave ligjore.
Policia e Durrësit asistoi në operacion për sigurimin e rendit dhe mbarëvajtjes së transportit. Lëvizja erdhi pas kërkesave të banorëve të zonës për largimin e kontejnerëve nga frika e kontaminimit.
Arrestimet e lidhura me çështjen
Gjykata e Durrësit firmosi 33 urdhër-arreste pak javë më parë për shkelje të rënda të legjislacionit mjedisor. Arrestimet përfshijnë përfaqësues të kompanive Kurum dhe Sokolaj, si dhe punonjës të institucioneve shtetërore, përfshirë Agjencinë Kombëtare të Mjedisit dhe Doganën e Durrësit.
Nga 33 masat e sigurisë, 20 janë ekzekutuar: 8 persona në arrest në burg, 5 në arrest shtëpie dhe 7 me detyrim paraqitjeje.