Banorët e Velipojës, konkretisht të zonës së Rrjollit, kanë vazhduar sot protestën për të shtatën ditë radhazi para ambienteve të Prokurorisë së Shkodrës. Ata kanë depozituar një kërkesë zyrtare drejtuar prokurorisë, ku kërkojnë një zgjidhje ligjore sa më të shpejtë për vërtetësinë e dokumenteve të pronësisë së tokës në atë zonë, ku po zhvillohet resorti turistik i Bashkim Ulajt.
Gjatë protestës, banorët kanë ngritur thirrje si “Larg hajdutët! Tokat tona nuk i dorëzojmë! Duam drejtësi! Ku është ai njeri që s’vjen të përballet me ne?”. Sipas tyre, dokumentacioni që zotërojnë dëshmon pronësinë e ligjshme të tokës dhe kërkojnë trajtimin me prioritet të çështjes për të shmangur zvarritjen e mëtejshme.
Ata kanë bërë thirrje që drejtësia të japë përgjigje sa më parë dhe të mos lërë konfliktin pezull, duke thelluar pasigurinë dhe tensionet në zonë. Gjithashtu, kanë sfiduar pretendimet e firmës ndërtuese se ka kryer një dëgjesë publike me banorët e Baks-Rrjollit, duke thënë se kjo nuk ka ndodhur.
Një banor ka deklaruar: “Firma që ka fituar këtë zhvillim të një resorti luksoz, pretendon se ka bërë një dëgjesë publike me fshatarët e Baks-Rrjollit. Këtë e sfidoj këtu sepse fshatarët e Baks-Rrjollit këta janë, nuk kemi të tjerë [...] Ne kërkojmë vetëm drejtësi! Drejtësia është cili i ka letrat false? Ne e dimë që i ka false!”.
Në protestë kanë marrë pjesë edhe emigrantë nga Gjermania dhe Anglia, të cilët kanë ardhur posaçërisht për të mbështetur banorët. Një prej tyre ka prejardhje nga Kosova dhe ka shprehur mbështetjen për zgjidhje përfundimtare dhe të drejtë të çështjes në institucionet e drejtësisë.
Përditësime
Belinda Balluku firmosi lejen e ndërtimit.
Zhvillimet kryesore:
- Protesta u zhvendos para Prokurorisë së Shkodrës dhe vazhdoi para Bashkisë së Shkodrës, ku banorët kërkuan sqarime nga kryebashkiaku Benet Beci për kompetencën e lejes dhe mungesën e reagimit.
- Bashkia Shkodër konfirmoi se nuk ka marrë pjesë në dëgjesat publike për procedurën e lejes.