Banorët e Selenicës dhe përfaqësues të komunitetit u mblodhën këtë të diel te Monumenti i Drashovicës për të shprehur kundërshtimin e tyre ndaj ndryshimeve në reformën e re territoriale. Me thirrje si “Selenica nuk mbyllet!” dhe “Larg duart nga Selenica!”, pjesëmarrësit argumentuan se shkrirja ose bashkimi i bashkisë së tyre me Vlorën do të dëmtonte shërbimet për qytetarët dhe zhvillimin e zonës.
Protesta, e cila zgjati për rreth 60 minuta, ishte pasuese e një kuvendi të zhvilluar gjatë mëngjesit të së shtunës. Gjatë aktivitetit, banorët mbajtën fjalime për të mbrojtur identitetin dhe historinë e Selenicës, ndërsa theksuan nevojën që bashkia të mbetet pranë qytetarëve për ofrimin e shërbimeve. Në tubim morën pjesë edhe përfaqësues dhe anëtarë të Partisë Demokratike, të cilët mbështetën kërkesat e qytetarëve.
Në përfundim të protestës, banorët e 47 fshatrave të zonës dorëzuan firmat e mbledhura në një peticion, nëpërmjet të cilit i bëjnë thirrje institucioneve dhe deputetëve të qarkut të Vlorës që të mos miratojnë shkrirjen e bashkisë. Të pranishmit deklaruan se kundërshtia ndaj këtij procesi do të vazhdojë, duke kërkuar që Selenica të ruajë statusin e saj si njësi administrative më vete.