Deputeti i Partisë Socialiste, Vullnet Sinaj, ka dalë kundër draftit të ri për reformën administrativo-territoriale, duke kundërshtuar bashkimin e Bashkisë Selenicë me Bashkinë Vlorë. Në një reagim publik, ai theksoi se vendimmarrja duhet të marrë parasysh interesin e qytetarëve dhe treguesit ekonomikë të zonës.
Sipas raportit të reformës "Reforma Administrativo-Territoriale 2.0", Bashkia Selenicë renditet e 29-ta në rang kombëtar sa i përket Indeksit të Funksionalitetit të Bashkive (IFB) me vlerën 57.3, si dhe e 29-ta për Indeksin e Performancës Ekonomike (IPE) me vlerën 42.2. Sinaj argumentoi se paga mesatare në këtë bashki prej 58.386 lekësh është pranë mesatares kombëtare, ndërsa detyrimet e prapambetura janë vetëm 3.6%, tregues më të mirë se mesatarja në rang vendi. I vetmi kriter penalizues, sipas tij, është Indeksi i Masës Urbane (IMU), për shkak të shpërndarjes së popullsisë nëpër fshatra, fakt që sipas deputetit, bën edhe më të domosdoshme ekzistencën e bashkisë për ofrimin e shërbimeve.
Deputeti kritikoi komisionin për mosvlerësimin e kontributit ekonomik të pasurive natyrore të zonës, duke përmendur Minierën e Selenicës dhe fushën naftëmbajtëse të Gorrishtit, ku prodhohen rreth 35 mijë tonë naftë bruto në vit. Sinaj theksoi se problemi kryesor qëndron te ndarja e padrejtë e buxhetit, ku 90% administrohet nga qeveria qendrore dhe vetëm 10% u shkon 61 bashkive. Ai kërkoi reformimin e ligjit për taksat kombëtare, duke kërkuar që renta minerare të rritet nga 5% në 30% për bashkitë, një nismë për të cilën ai është angazhuar prej katër vitesh me mbështetjen e OSBE.
Ndërkohë, raportohet se banorët e Selenicës kanë nisur protesta kundër këtij projekti, duke i bërë thirrje qeverisë të rishqyrtojë vendimin për shkrirjen e bashkisë.