Banorët e prekur nga projekti TID për rijetëzimin e qendrës historike të Durrësit u mblodhën sërish këtë të mërkurë para Bashkisë Durrës, duke kërkuar sqarime mbi procedurat e shpronësimit dhe transparencë në zbatim.
Ndryshe nga e martën, kur nuk u pranë, një përfaqësi u takua me drejtoreshën ligjore Alneida Rroshi. Pas takimit, arkitektja Entela Koja, përfaqësuese e banorëve, deklaroi se bashkia po rishikon nga e para të gjitha objektet dhe po verifikon statusin e tyre ligjor para lëshimit të VKM-së për shpronësimet.
Banorët, kryesisht 20 familje pranë zonës së amfiteatrit, shprehin shqetësim për parregullsitë në fazën fillestare të projektit, mungesën e verifikimit të plotë dhe ndryshimet në destinacionin e pronave, përfshirë ato të komuniteteve fetare. Ata kërkojnë informacion me shkrim, afate konkrete dhe evidentim të pronave nga një grup pune i Ministrisë së Kulturës. «Ne nuk jemi për prishje e shpronësim aty ku nuk ka nevojë», tha Koja.
Projekti TID, i realizuar nga Ministria e Kulturës, Bashkia Durrës dhe AADF, parashikon transformimin e zonës së amfiteatrit antik dhe bulevardit Epidamn. Ai prek rreth 74-80 familje me banesa dhe biznese, për të cilat është parashikuar një fond kompensimi prej 315 milionë lekësh. Banorët insistojnë të jenë pjesë e procesit dhe dyshojnë në procedurat shtetërore pa përgjigje të shkruar.