Bashkësia Islame e Kosovës (BIK) ka marrë vendim që të gjitha strukturat dhe institucionet e saj të obligohen për vendosjen dhe ekspozimin e flamurit të Ushtrisë Çlirimtare të Kosovës (UÇK). Sipas vendimit të nënshkruar nga kryemyftiu Naim Tërnava, pas mbledhjes së Kryesisë së BIK-ut, flamuri i UÇK-së do të vendoset edhe në minaret e xhamive, krahas hapësirave të zakonshme ku ekspozohen flamujt.
Ky veprim ndërmerret pak kohë para shpalljes së aktgjykimit nga Dhomat e Specializuara në Hagë ndaj ish-krerëve të UÇK-së: Hashim Thaçi, Kadri Veseli, Jakup Krasniqi dhe Rexhep Selimi. Seanca gjyqësore është caktuar për datën 16 shtator 2026, në orën 10:00.
Në të njëjtën kohë, flamuri i UÇK-së është vendosur edhe në Ambasadën e Kosovës në Hagë. Ndërkohë, platforma “Liria ka Emër” ka njoftuar se aktivitetet mbështetëse janë zhvendosur drejt Hagës, ku pritet të mbahet edhe “Nata e Pritjes” për të shënuar zhvillimet e fundit gjyqësore.
Përditësime
Bashkësia Islame e Kosovës (BIK) specifikoi se ky veprim shpreh organizimin, solidaritetin dhe nderimin për luftën e UÇK-së. Institucioni shprehu zyrtarisht shpresën për pafajësinë e ish-krerëve të UÇK-së në procesin gjyqësor në Hagë.