Drejtori i Arsimit në Komunën e Prishtinës, Arianit Elshani, ka njoftuar zyrtarisht se ka kërkuar nga të gjitha institucionet arsimore publike të kryeqytetit që, përkrah flamurit të Republikës së Kosovës, në hyrjet e tyre të vendoset edhe flamuri i Ushtrisë Çlirimtare të Kosovës (UÇK).
Në shkresën drejtuar drejtorëve të shkollave, Elshani ka theksuar se UÇK-ja është pjesë e pandashme e historisë së çlirimit të Kosovës. Sipas tij, lufta dhe sakrifica për lirinë e vendit përbëjnë një kapitull të rëndësishëm të historisë së re, ndërsa shkollat duhet të shërbejnë si vende ku formohet kujtesa historike dhe qytetare e brezave të rinj.
“Liria që gëzojmë sot ka një histori. Dhe ajo histori duhet të kujtohet, të respektohet dhe t’u përcillet brezave që vijnë”, thuhet në shkresën zyrtare. Drejtoria e Arsimit ka kërkuar që ky proces të realizohet në mënyrë dinjitoze dhe të njëtrajtshme, duke respektuar rregullat përkatëse institucionale dhe protokollare.
Kjo nismë vjen në një periudhë reflektimi për historinë e vendit, ndërsa sipas burimeve të "Epokës së Re", kërkesa është shpalosur një ditë pas shpalljes së aktgjykimit dënues nga Dhomat e Specializuara të Kosovës në Hagë për ish-udhëheqësit e UÇK-së: Hashim Thaçin, Kadri Veselin, Rexhep Selimin dhe Jakup Krasniqin.