Kryetarja e komanduar e Bashkisë së Tiranës, Anuela Ristani, gjatë mbledhjes së Këshillit Bashkiak, dha detaje mbi procesin e kredive të lehtësuara për familjet. Sipas të dhënave zyrtare, nga 4409 aplikime të regjistruara, në fazën e parë janë shpallur fitues 2871 familje.
Aktualisht, autoritetet bashkiake janë duke shqyrtuar ankimimet e dorëzuara pas fazës së parë. Pas përfundimit të këtij procesi, do të publikohet lista përfundimtare e aplikantëve fitues dhe jofitues.
Bashkia e Tiranës njoftoi se paralelisht me shqyrtimin e ankimimeve, do të çelet thirrja për fazën e dytë të kredive. Dokumentacioni i nevojshëm për këtë fazë do të dorëzohet pranë sporteleve të pritjes së qytetarëve ose nëpërmjet shërbimit të Postës Shqiptare. Afati i fundit për dërgimin e dokumentacionit është përcaktuar data 31 korrik 2026. Një njoftim i dytë publik do të detajojë udhëzimet për të gjithë të interesuarit.