Komandanti i Forcës së Sigurisë së Kosovës (FSK), gjenerallejtënant Bashkim Jashari, ka pritur në një takim zyrtar komandantin e Regjimentit të Operacioneve Speciale të Republikës së Shqipërisë dhe komandantin e Komandës së Forcave të Operacioneve Speciale të Republikës së Kroacisë.
Sipas njoftimit zyrtar të FSK-së, takimi u fokusua te bashkëpunimi i ndërsjellë, koordinimi dhe shkëmbimi i përvojave profesionale ndërmjet forcave pjesëmarrëse. Temat kryesore të diskutimit përfshinë zhvillimin e kapaciteteve operacionale, trajnimet e avancuara dhe operacionet speciale. Gjenerallejtënant Jashari vlerësoi partneritetin e vazhdueshëm me forcat partnere, duke e konsideruar këtë bashkëpunim si thelbësor për rritjen e aftësive profesionale të FSK-së.
Një pjesë e rëndësishme e bisedimeve iu kushtua stërvitjeve të përbashkëta, të cilat u vlerësuan si mjete kyçe për forcimin e ndërveprueshmërisë midis ushtrive të shteteve pjesëmarrëse. Në këtë kuadër, palët diskutuan për ushtrimin “Valor Shield 2026”, si një platformë për shkëmbimin e ekspertizës dhe thellimin e bashkëpunimit ndërinstitucional.