Presidentja e Republikës së Kosovës, Justina Shiroka Pula, në cilësinë e Komandantes Supreme të Forcës së Sigurisë së Kosovës (FSK), ka zhvilluar takime të ndara me drejtuesit kryesorë të institucioneve të sigurisë në vend.
Gjatë takimit me gjenerallejtënant Bashkim Jashari, komandant i FSK-së, palët diskutuan për zhvillimet aktuale në fushën e sigurisë dhe rëndësinë e vazhdimit të punës për forcimin e kapaciteteve profesionale dhe operacionale të kësaj force, në përmbushje të misionit të saj kushtetues. Gjenerallejtënant Jashari e uroi presidenten Shiroka Pula për marrjen e detyrës.
Në një takim të veçantë, presidentja priti gjithashtu drejtorin e Agjencisë së Kosovës për Inteligjencë (AKI), Petrit Ajeti. Gjatë këtij bashkëbisedimi, drejtori Ajeti e njoftoi presidenten mbi situatën aktuale të sigurisë kombëtare. Fokus kryesor i takimit ishte koordinimi ndërmjet institucioneve të sigurisë, me synim garantimin e një mjedisi të sigurt për të gjithë qytetarët e Republikës së Kosovës.
Këto takime vijnë vetëm pak ditë pas emërimit të Shiroka Pulës në krye të shtetit, proces ky që erdhi si rrjedhojë e një marrëveshjeje politike ndërmjet Lëvizjes Vetëvendosje dhe Partisë Demokratike të Kosovës.