Kryetari i Komunës së Deçanit, Bashkim Ramosaj, ka publikuar një reagim zyrtar për të sqaruar ndërhyrjet në rrugën që kalon brenda Zonës së Veçantë të Mbrojtur, përreth Manastirit të Deçanit. Sipas Ramosajt, aktiviteti kishte karakter teknik dhe mirëmbajtës.
Ndërhyrjet e kryera gjatë dy ditëve të fundit përfshinë mbushjen e gropave, heqjen e vegjetacionit dhe shkurreve, si dhe pastrimin e pluhurit të grumbulluar përgjatë aksit rrugor. Kryetari ka mohuar kategorikisht pretendimet për çfarëdo aktiviteti tjetër ndërtimor, duke bërë thirrje për një vlerësim objektiv të gjendjes. Ai nënvizoi se këto punime janë realizuar edhe në të kaluarën, në koordinim me personelin e manastirit, konkretisht me At Saven.
Në reagimin e tij, Bashkim Ramosaj ka riafirmuar përkushtimin e komunës për respektimin e Ligjit për Zonat e Veçanta të Mbrojtura dhe marrëveshjeve përkatëse që rregullojnë mirëmbajtjen e rrugës në këtë zonë. Ai kërkoi mirëkuptimin e akterëve vendorë dhe ndërkombëtarë, duke vënë në dukje se qëllimi i institucioneve lokale është garantimi i një qarkullimi të sigurt dhe ruajtja e harmonisë në qytet.
Aktualisht, aktiviteti i mirëmbajtjes ka përfunduar dhe kryetari shprehu shpresën se nuk do të ketë nevojë për ndërhyrje të tjera në të ardhmen e afërt.