Bashkimi Europian ka vendosur të pezullojë fondet për axhendën digjitale të Shqipërisë, për shkak të korrupsionit te Agjencia Kombëtare e Sigurisë së Informacionit (AKSHI). Ky është rasti i dytë pas ndërprerjes së financimeve për fermerët.
Sipas tre burimeve të pavaruara, Komisioni Europian ka njoftuar zyrtarisht qeverinë shqiptare për ngrirjen pa afat të këtyre fondeve, me argument mbrojtjen e interesit të taksapaguesve evropianë. Vendimi erdhi pas shpërthimit të aferës së AKSHI-së.
Financimet e pezulluara përfshijnë disa programe kryesore:
- Programin operacional shumëvjeçar për ekonominë dhe shoqërinë digjitale (2024-2027), në kuadër të Instrumentit të Asistencës së Paraanëtarësimit (IPA). Ky program ka buxhet total 44 milionë euro, prej të cilëve 30 milionë euro financohen nga Bashkimi Europian. Marrëveshja u miratua në verën e këtij viti nga Këshilli i Ministrave.
- Programin për pajisjen me laboratorë smart të 600 shkollave në vend, në kuadër të Kuadrit të Investimeve për Ballkanin Perëndimor. Projekti ka kosto totale 44.3 milionë euro, me 14 milionë euro grant nga BE.
Axhenda digjitale është pjesë edhe e Planit të Riljes, ku Bashkimi Europian ka angazhuar 6 miliardë euro për vendet e Ballkanit Perëndimor. Vlera e saktë totale e fondeve të pezulluara ende nuk është plotësisht e qartë.
Përditësime
Zyra Europiane Kundër Mashtrimit (OLAF) ka konfirmuar zyrtarisht hetimin mbi keqpërdorimin e dyshuar të fondeve IPARD në Shqipëri. Hetimet fokusohen në 33 milionë euro, pjesë e paketës prej 112 milionë eurosh të bllokuara për sektorin e bujqësisë. Ky pezullim cenon besueshmërinë e menaxhimit të fondeve të Bashkimit Europian nga institucionet shqiptare, duke rrezikuar përthithjen e 1 miliard eurove të parashikuara deri në vitin 2027.